seconder

Seconder à autruy et luy aider en quelque propos, Orationi alterius subseruire, Subsidiario adesse.

Seconder, c'est proprement estre tout au plus pres de celuy qui est le premier. Et partant, Seconder aucun en aage entre mesmes freres, c'est luy estre plus proche d'ans que les autres freres. Des Essars en Josephe au 1. livre. Or avoit Aristobolus de tous ses freres, Antigonus qui le secondoit en aage. par l'energie du mot, il est assez cogneu que seconder ne signifie aucunement estre pareil à celuy qu'on seconde, ains luy estre le plus proche et joingnant devant tous autres en quelque chose que ce soit qu'on le seconde. Ainsi seconder un autre en preud'hommie, foy, loyauté et parole, c'est estre le plus approchant la preud'hommie, foy, loyauté et parole, de celuy qui tient le premier reng en cela. Et quand on dit d'une femme qui en beauté n'a point de seconde, c'est autant à dire, comme qu'elle excelle tant en beauté toutes autres, que de nulle en est approchée de pres, et ainsi les Latins disent, In secundis aut tertiis consistere. Seconder aussi est prins pour aider à aucun, d'autant que qui est second à autre, il releve ce que son premier laisse, et ne peut embrasser, et voila comme plus esloignéement de ladite proprieté du mot, on dit, Seconder l'un l'autre en un combat, pour s'entre-secourir, qui est quand deux ou plusieurs se combatans à autres, sont si pareils en forces et experiences des armes, qu'on ne peut dire qui en cela est le premier.

Thresor de la langue françoyse. Jean Nicot.